Хуан Гуайдо: Калі нам давядзецца засядаць на дварэ, мы зробім гэта

• 15.05.2019, 9:31

Законны прэзідэнт Венесуэлы пракаментаваў блакаванне парламента вайскоўцамі.

Лідар венесуэльскай апазіцыі і законны прэзідэнт краіны Хуан Гуайдо ў аўторак абвінаваціў улады рэспублікі ў спробе закрыць Нацыянальную асамблею (аднапалатны парламент). Адпаведную заяву ён зрабіў падчас выступу перад сваімі прыхільнікамі ў Каракасе, паведамляе ТАСС.

«У іх [уладаў] без сумневу адна мэта - закрыць асамблею. Дзяржаўны тэрарызм - гэта адзінае, што можа прапанаваць Нікалас Мадура», - заявіў Гуайдо, чый выступ трансляваў прыватны канал TVV.

Апазіцыянер падкрэсліў, што дэпутаты гатовыя працягнуць сваю заканатворчую дзейнасць ужо заўтра. «Мы працягнем працаваць і не кінем парламент. Калі нам давядзецца засядаць на дварэ, мы зробім гэта», - дадаў ён.

Раней супрацоўнікі Баліварыянскай службы нацыянальнай выведкі (СЕБІН) увайшлі ў памяшканні венесуэльскага парламента ў сувязі з «магчымым выбуховым прыстасаваннем».

У аўторак у парадку дня парламентарыяў значылася абмеркаванне пытанняў, звязаных з затрыманнем першага віцэ-спікера Эдгара Самбрано. Ён быў узяты пад варту на мінулым тыдні неўзабаве пасля таго, як у Каракасе прайшлі антыўрадавыя выступы.

30 красавіка на баку лідара апазіцыі Хуана Гуайдо выступіла група вайскоўцаў, пасля чаго ў краіне аднавіліся маштабныя акцыі пратэсту. Падчас маніфестацый, якія суправаджаліся сутычкамі з сілавікамі, пацярпелі некалькі сотняў чалавек, пяцёра загінулі. Са звестак няўрадавых арганізацый, за два дні былі затрыманыя не менш за 240 удзельнікаў пратэстаў.