У Падмаскоўі падпалілі будынак габрэйскай акадэміі

• 19.04.2019, 21:32

Невядомыя падпалілі будынак ешывы «Торат Хаім» - найбуйнейшую з габрэйскіх навучальных устаноў РФ.

Невядомыя падпалілі будынак ешывы «Торат Хаім» - найбуйнейшую з габрэйскіх навучальных устаноў Расеі, якая размешчаная ў Раменскім раёне Падмаскоўя.

Пра гэта РБК паведаміла прэс-сакратарка галоўнага рабіна Масквы Вольга Есаулава.

З ейных слоў, невядомыя падпалілі склад кашэрнага мяса і намалявалі свастыку. «Ніхто з людзей не пацярпеў. Мы ўпэўненыя, што гэта быў падпал», - сказала яна.

У прэс-службе ГУ МНС Масквы заявілі РБК: «Пакуль ніякіх заявак па гэтым адрасе ў нас няма».

Равін ешывы Мойша Лебель паведаміў «РИА Новости», што ў момант здарэння ў будынку ўстановы знаходзіліся 60 студэнтаў, рабінаў і гасцей, якія прыйшлі на седэр - рытуальную трапезу з нагоды Песаха.

Песах - цэнтральнае іудзейскае свята ў памяць аб сыходзе з Егіпта. Сёлета ён адзначаецца з 19 да 27 красавіка.