«Укрнафта» перамагла Расею ў міжнародным арбітражы
- 16.04.2019, 15:00
Украінская кампанія спагнала з РФ больш за $44,4 млн.
Арбітражны суд наважыў спагнаць з Расеі на карысць «Укрнафты» $44,4 млн кампенсацыі за экспрапрыяцыю маёмасці кампаніі ў акупаваным Крыме. Пра гэта паведамляе liga.net са спасылкай на прэс-службу «Укрнафты».
«12 красавіка 2019 года арбітражны суд сваёй пастановай спагнаў з РФ на карысць кампаніі $44,4 млн кампенсацыі за экспрапрыяцыю інвестыцый кампаніі на тэрыторыі Крыму, а таксама больш за $3,5 млн арбітражных выдаткаў», - гаворыцца ў паведамленні.
На суму кампенсацыі, згодна з пастановай арбітражнага суда, налічваюцца адсоткі з 22 красавіка 2014 года. На красавік 2019 сума налічаных адсоткаў перавысіла $5,5 млн.
Паводле інфармацыі «Укрнафты», незаконныя ўзброеныя фармаванні дзяржавы-агрэсара неўзабаве пасля анэксіі Крыма захапілі адміністрацыйныя памяшканні і 16 аўтазаправачных станцый кампаніі.
«Усе спробы «Укрнафты» вярнуць кантроль над захопленымі адміністрацыйнымі памяшканнямі і АЗС (у тым ліку прадуктовымі крамамі, абсталяваннем і адпаведнымі дазволамі і ліцэнзіямі) праз звароты ў праваахоўныя органы дзяржавы-агрэсара выявіліся марнымі», - адзначылі ў кампаніі.
У кастрычніку 2014 года «Укрнафта» паведаміла дзяржаве-агрэсару аб парушэнні правоў, узгадаўшы палажэнні Пагаднення паміж Кабінетам Міністраў Украіны і Урадам Расеі аб заахвочванні і ўзаемнай абароне інвестыцый. Аднак у РФ паведамленне «Укрнафты» праігнаравалі.
«У сувязі з гэтым 3 чэрвеня 2015 года ПАТ «Укрнафта» перадало спрэчку на разгляд у арбітражны суд ad hoc у адпаведнасці з Арбітражным рэгламентам Камісіі Арганізацыі Аб'яднаных Нацый у праве міжнароднага гандлю (ЮНСІТРАЛ). Пастановай ад 26 чэрвеня 2017 года арбітражны суд прызнаў наяўнасць у яго юрысдыкцыі разглядаць спрэчку паводле Дамовы», - дадалі ў кампаніі.
Расея абскардзіла гэтую пастанову ў Вярхоўным Судзе Швэйцарыі, але апошняй пастановай ад 16 кастрычніка 2018 суд адхіліў пазоў РФ. Пры гэтым Вярхоўны Суд Швэйцарыі пагадзіўся з арбітражным судом у тым, што «Укрнафта» з'яўляецца інвестарам у пагадненні, а яе маёмасць на тэрыторыі Крыму - інвестыцыямі.