Навукоўцы давялі, што спорт пасля 40 гадоў падаўжае жыццё
- 26.03.2019, 15:29
Пачаць займацца спортам ніколі не позна.
Ні для кога не сакрэт, што спорт карысны для здароўя, пра што сведчаць вынікі розных даследаванняў навукоўцаў, праведзеныя ў розны час у розных краінах свету.
Зрэшты, ніводнае з праведзеных раней даследаванняў не адказвае на пытанне пра тое, ці знізіцца карысць спорту для здароўя, калі займацца ім нерэгулярна або пачаць у больш сталым узросце, праігнараваўшы фізічную актыўнасць цягам большай часткі свайго жыцця. Навукоўцы Нацыянальнага інстытута анкалогіі ЗША наважылі правесці даследаванне, каб адказаць на гэтае пытанне, піша Time (пераклад - «Новое время»).
Падчас даследавання, вынікі якога былі апублікаваныя ў навуковым часопісе JAMA Network Open, навукоўцы аналізавалі звесткі 300 тысяч пацыентаў ва ўзросце ад 50 да 70 гадоў. Спецыялісты вывучалі інфармацыю аб тым, як часта і наколькі рэгулярна людзі займаліся спортам цягам жыцця, пасля чаго супастаўлялі звесткі аб рэжыме трэніровак або іх адсутнасці са станам здароўя рэспандэнтаў.
У выніку ім удалося давесці, што пачаць займацца спортам ніколі не позна. Да такіх высноў навукоўцы прыйшлі, высветліўшы, што фізічныя практыкаванні зніжаюць рызыку смерці нават у тым выпадку, калі чалавек пачынае займацца спортам ужо пасля 40 гадоў.
Акрамя таго, даследаванне паказала, што ў людзей, якія рэгулярна займаліся спортам цягам усяго свайго жыцця, рызыка заўчаснай смерці быў у сярэднім на 29-36 адсоткаў меншай, чым у тых, хто ігнараваў фізічную актыўнасць.
«Заняткі спортам прыносяць істотную карысць для здароўя і зніжаюць рызыку смерці практычна ад усіх хвароб - ад рака да сэрцава-судзiнных захворванняў», - кажа аўтар даследавання, доктар Пэдра Сен-Морыс.
Спецыяліст дадаў, што фізічная актыўнасць зніжала рызыку заўчаснай смерці нават у тых людзей, якія пачалі сачыць за сваім здароўем і займацца спортам ўжо пасля 40 гадоў. Прычым, на вялікія 32-35 адсоткаў у параўнанні з тымі, хто ігнараваў фізічныя практыкаванні, як да, так і пасля 40 гадоў.
Навукоўцы здолелі высветліць яшчэ адзін цікавы факт, давёўшы, што людзі, якія рэгулярна трэніраваліся ў маладосці, але адмовіліся ад заняткаў у сталым веку, гублялі ўсе перавагі спорту для здароўя.