Трамп паабяцаў знішчыць апошнюю апору ІД у Сірыі да вечара

• 20.03.2019, 21:23

Трамп паказаў дзве мапы з размяшчэннем ІД у Сірыі - у дзень абрання яго прэзідэнтам ЗША і на гэты момант.

Прэзідэнт ЗША Дональд Трамп заявіў, што апошні аплот тэрарыстычнай групоўкі «Ісламская дзяржава» (ІД) у Сірыі «будзе ліквідаваны да вечара». Пра гэта амерыканскі лідар заявіў на брыфінгу, паведамляе РБК са спасылкай на CBS.

Трамп прадэманстраваў журналістам дзве мапы: на адной з іх чырвоным колерам пазначаныя месцы знаходжання «Ісламскай дзяржавы» ў Сірыі ў дзень, калі ён быў абраны прэзідэнтам ЗША, на другой - цяперашняе становішча ІД у выглядзе невялікага пункта.

«Я прынёс гэта для вас, у ноч выбараў у 2016 годзе гэтая мапа была ўся чырвоная. І ўся чырвоная - «Ісламская дзяржава», - сказаў прэзідэнт. «Цяпер там няма чырвонага, на самай справе ёсць маленькая пляма, якая знікне сёння ўвечары», - дадаў ён.

У сярэдзіне сакавіка спецпрадстаўнік ЗША ў Сірыі Джэймс Джэфры заяўляў, што колькасць байцоў ІД у Сірыі ацэньваецца ў некалькі сотняў, а плошча тэрыторыі, якую яны займаюць, не перавышае 1 кв. км.

У сераду Трамп таксама паведаміў, што ЗША маюць намер скараціць сваю вайсковую прысутнасць у Сірыі да 400 чалавек. «У Сірыі мы пакідаем больш за 200 чалавек. Яшчэ 200 чалавек у іншым месцы ў Сірыі, бліжэй да Ізраіля, на [пэўны] перыяд», - адзначыў ён, не ўдакладніўшы, пра які канкрэтна тэрмін ідзе гаворка.