Уначы ў Менску гарэў сямейны інтэрнат

• 23.02.2019, 12:22

Сем чалавек у лякарні, сярод іх чатыры дзіцяці.

Уначы ў Менску загарэўся адзін з пакояў сямейнага інтэрната ў завулку Соф'і Кавалеўскай. Пацярпелі 7 чалавек, у тым ліку 4 дзіцяці. Усяго было эвакуявана 223 чалавекі, паведамляе прэс-служба МНС.

Паведамленне пра загаранне блок-пакоя на 2-м паверсе дзевяціпавярховага інтэрната № 1 філіяла ААТ Кіроўчая кампанія холдынгу «Гарызонт» паступіла ратавальнікам у 01.02 23 лютага. Высветлілася, што ў холе блока на 8 пакояў адбылося загаранне маёмасці і мэблі на плошчы 12 кв. метраў.

Як паведамілі Onliner.by відавочцы, агонь быў такой сілы, што плавіліся пластыкавыя прадметы на тры паверхі вышэй. Людзі сцвярджаюць, што пажарная сігналізацыя не спрацавала.

Супрацоўнікамі МНС супольна з адміністрацыяй з будынка эвакуявана 223 чалавекі, з іх 40 дзяцей. Пажар быў лакалізаваны і ліквідаваны ратавальнікамі.

Ужо пасля ліквідацыі пажару самастойна па медыцынскую дапамогу звярнуліся сем чалавек (у тым ліку чацвёра дзяцей), якіх даставілі ў лякарні. Асноўны папярэдні дыягназ – атручэнне прадуктамі гарэння.

Прычына здарэння высвятляецца, разглядаецца версія кароткага замыкання электраправодкі ў холе на 2-м паверсе.

Падобнае здарэнне адбылося ў сталіцы 7 лютага. Тады ноччу, нагадаем, пажар узнік у інтэрнаце Лінгвістычнага ўніверсітэта. Давялося эвакуяваць больш за тысячу чалавек. Тры чалавекі патрапілі ў лякарню. Як апавялі тады tut.by студэнты, «пажарная трывога не спрацавала ўвогуле. На некаторых паверхах студэнты-замежнікі, хлопцы, бегалі і грукалі ў дзверы, каб людзі выходзілі».