Актывісткі Femen у Парыжы спрабавалі прарвацца на «Нармандскую сустрэчу»
- 9.12.2019, 18:21
На актывістках былі намаляваныя сцягі Украіны, Грузіі і Сірыі.
Прадстаўніцы руху Femen спрабавалі прарвацца ў Елісейскі палац, дзе сёння адбудзецца саміт «нармандскай чацвёркі».
Пра гэта паведамляе з Парыжа карэспандэнт «Европейской правды».
У панядзелак на ўваход на тэрыторыю палаца, дзе адбываецца пропуск акрэдытаваных журналістаў, прыйшлі прадстаўніцы руху. У той час сюды прапускалі людзей без выстаўлення дакументаў.
Дзве дзяўчыны распрануліся і з крыкамі «Stop Putin's wars» пераскочылі праз плот, але былі хутка затрыманыя жандарамі. На актывістках таксама былі намаляваныя сцягі Украіны, Грузіі і Сірыі.
Пасля інцыдэнту пропуск да вуліцы каля палаца абмежавалі, сталі прапускаць толькі журналістаў.