Кіраўнік МЗС Нямеччыны: Уладзімір Зяленскі праявіў смеласць
- 8.12.2019, 11:54
Заява Хайка Маса зробленая напярэдадні саміту ў «нармандскім фармаце» ў Парыжы.
Міністр замежных справаў Нямеччыны Хайка Мас (Heiko Maas) запатрабаваў ад Масквы большай гатоўнасці ісці насустрач Кіеву пры развязанні канфлікту на ўсходзе Украіны. Адпаведную заяву кіраўнік МЗС ФРГ зрабіў у інтэрв'ю нямецкаму выданню Bild am Sonntag, вытрымкі з якога апублікаваныя ў нядзелю, 8 снежня, паведамляе dw.com.
Каментар Маса абнародаваны напярэдадні сустрэчы ў "нармандскім фармаце", у рамках якой Нямеччына, Расея, Украіна і Францыя 9 снежня ў Парыжы будуць абмяркоўваць шляхі мірнага развязання канфлікту ў Данбасе.
"Пасля некалькіх гадоў бяздзейнасці прэзідэнт (Украіны Уладзімір. – Рэд.) Зяленскі праявіў смеласць, зрабіўшы першыя крокі – з усімі іх спадарожнымі ўнутрыпалітычнымі рызыкамі і пабочнымі эфектамі", – падкрэсліў міністр.
Цяпер – чарга Масквы прадэманстраваць, што далейшыя дамоўленасці магчымыя, упэўнены кіраўнік МЗС. Аднак для гэтага яшчэ трэба будзе прыкласці немалыя дыпламатычныя намаганні, папярэдзіў Мас. "З гэтай мэтай мы супольна з Францыяй яшчэ павінны зрабіць уздзеянне на Расею", – дадаў ён.
Пра палітычныя рознагалоссі Масквы і Берліна
Нямецкі міністр нагадаў пра палітычныя рознагалоссі, якія ўзніклі ў РФ і ФРГ у сувязі з забойствам былога чачэнскага палявога камандзіра Зелімхана Хангашвілі ў нямецкай сталіцы і недастаткова актыўнай дапамогай Масквы ў расследаванне ў гэтай справе. "Нягледзячы на сур'ёзныя пытанні, якія цяпер абмяркоўваюць Берлін і Масква, у панядзелак (9 снежня. – Рэд.) гаворка пойдзе пра спыненне кровапраліцця на еўрапейскай тэрыторыі, што здзяйсняецца практычна на штодзённай аснове", – паабяцаў ён.
Канцлерка ФРГ Ангела Меркель (Angela Merkel) перад пачаткам саміту ў "нармандскім фармаце" правядзе індывідуальныя сустрэчы з прэзідэнтам Расеі Уладзімірам Пуціным і ягоным украінскім калегам Уладзімірам Зяленскім.
Паводле звестак агенцтва dpa, гаворка на сустрэчы з расейскім лідарам можа пайсці пра нядаўні дыпламатычны крызіс паміж Масквой і Берлінам.
У сувязі з адсутнасцю актыўнай дапамогі РФ у расследаванні забойства Хангашвілі МЗС ФРГ абвесціў двух супрацоўнікаў расейскай амбасады персонамі нон грата. Расея паабяцала ўжыць люстраныя захады, але пакуль не зрабіла гэтага.
Меркель падтрымала пастанову пра высылку дыпламатаў. Пры гэтым яна выказала надзею на тое, што скандал вакол забойства Хангашвілі не зробіць негатыўнага ўплыву на саміт у Парыжы.
Застрэлены ў цэнтры Берліна
Зелімхан Хангашвілі, які з'яўляўся палявым камандзірам падчас другой чачэнскай вайны, быў застрэлены 23 жніўня ў берлінскім парку Малы Тыргартэн. Раней улады Расеі абвесцілі яго ў вышук паводле абвінавачвання ў тэрарызме. Хангашвілі з'ехаў у Нямеччыну пасля таго, як у 2015 годзе ў Грузіі на яго быў здзейснены чарговы замах.
Меркаванага забойцу затрымалі ў Берліне ў той самы дзень дзякуючы сведкам. Ім аказаўся мужчына з расейскім пашпартам на імя Вадзіма Сакалова. Партал журналісцкіх расследаванняў The Insider 3 студзеня паведаміў, што Вадзім Сакалоў – на самай справе 54-гадовы Вадзім Красікаў, якога Расея абвяшчала ў вышук праз Інтэрпол у 2014 годзе.
Расследаванне забойства 4 снежня ўзяла на сябе Федэральная пракуратура Нямеччыны. Такое адбываецца толькі пры падазрэнні, што да злачынства датычныя спецслужбы іншай дзяржавы. Як паведаміла прэс-служба ўстановы, нямецкія следчыя органы правераць падазрэнні ў магчымай датычнасці дзяржаўных органаў РФ або Чачні да арганізацыі забойства Хангашвілі.