Трамп заклікаў дэмакратаў хутчэй аб'явіць яму імпічмент

• 5.12.2019, 18:14

Пра гэта прэзідэнт ЗША напісаў у Twitter.

Прэзідэнт ЗША Дональд Трамп заклікаў дэмакратаў палаты прадстаўнікоў хутчэй абвесціць яму імпічмент.

«Калі вы збіраецеся аб'явіць мне імпічмент, зрабіце гэта цяпер, хутка, каб мы змаглі правесці справядлівы судовы разбор у Сенаце і наша краіна магла вярнуцца да справы», - напісаў Трамп у Twitter у чацвер, 5 снежня.

У Белым доме таксама заявілі, што адпрэчваюць абвінавачванні дэмакратаў у адрас Трампа і чакаюць «справядлівага суда» ў Сенаце.

Як паведамляе CNN, спікерка Палаты прадстаўнікоў Нэнсі Пэласі даручыла падрыхтаваць афіцыйнае абвінавачванне ў адрас Трампа. Яна даручыла старшыні судовай палаты Джэры Надлер прыступіць да імпічменту.

«У Амерыцы ніхто не стаіць вышэй за закон. Прэзідэнт злоўжываў сваёй уладай дзеля ўласнай асабістай палітычнай выгады ў шкоду нашай нацыянальнай бяспецы. Сёння я прашу нашу старшыню прыступіць да імпічменту», - сказала Пэласі.