«Калі бачаць у рэзюмэ, што табе 48, нават на сумоўе не клічуць»
- 16.12.2019, 9:15
Мянчанка апавяла пра эйджызм пры прыёме на працу.
Не раз у інтэрв'ю Onliner эксперты заяўлялі, што беларусы ва ўзросце блізу 50 і старэйшыя – гэта адна з самых неабароненых катэгорый на рынку працы. Калі спецыялісты ў гэтым узросце застаюцца без працы, то знайсці месца вельмі складана. З такой праблемай сутыкнулася і мянчанка Алена. Ёй 48 гадоў, і яна добры спецыяліст са стажам. Паводле словаў Алены, вось ужо паўтара месяца яна шукае працу, але ніхто не запрашае яе нават на сумоўі. Хоць як працаўнік яна адпавядае ўсім параметрам. Уся рэч ва ўзросце, мяркуе жанчына.
«Трапілася нават вакансія на выпіску ТТН з заробкам ад 200 рублёў»
Алена і яе муж працуюць разам у маленькай кампаніі вось ужо 15 гадоў. Яна юрысконсульт, а паводле сумяшчальніцтва яшчэ офіс-мэнэджар і часткова бухгалтар.
– Цяпер для бізнэсу надышлі вельмі складаныя часы, і паўстала пытанне, што фірма можа зачыніцца. Калі гэта здарыцца, то мы абое апынемся без працы, – тлумачыць Алена. – Таму паралельна я шукаю месца нам абаім. Хто першы зможа знайсці працу, той і сыдзе.
Менавіта таму жанчына просіць не паказваць яе твар, бо перажывае, што працадаўца можа яе звольніць, а новую працу знайсці пакуль ніяк не атрымліваецца.
Пошукі Алена пачала паўтара месяца таму. Яна склала рэзюмэ і стала маніторыць спецыялізаваныя сайты. Жанчына ўважліва вычытвала патрабаванні ў вакансіях і адгукалася толькі на тыя, для якіх падыходзіла на 100%.
– Навошта наймальніку марнаваць на мяне час? Магчыма, ён знойдзе некага здатнага, – разважае Алёна. – Крыўдзіць тое, што мне не даюць нават шанцу. Да прыкладу, была адна вакансія, паводле якой я ідэальна падыходзіла. Быў патрэбны досвед, выпіска таварна-транспартных накладных, веданне 1С, праца пазменна. Я абдумала, ці магу працаваць пазменна, усё ўзважыла і адгукнулася. Кампанія адразу ж мне адмовіла. Без тлумачэння прычынаў. Ну вось на якой падставе? Я цалкам падыходзіла, валодаю 7-й версіяй «1С: Бухгалтэрыя», вельмі шмат працавала ў гэтай праграме, у мяне ўсе навыкі і кваліфікацыі ёсць.
Акрамя як праз узрост, больш прычынаў для адмовы не было. І так вельмі многія працадаўцы – альбо адразу адмова, альбо проста маўчанне без адказу.
Паводле словаў мянчанкі, яна цвяроза і рэальна ацэньвае свае сілы. У вакансіях, якія яна разглядала, не было казачных заробкаў.
– Як правіла, прапануюць 600–800 рублёў, – кажа Алена. – Праўда, я засталася трохі ў шоку ад запытаў працадаўцаў. Да прыкладу, на вакансію юрыста патрабуецца досвед у галіне прэтэнзійных пытанняў, судовага і дасудовага рэгулявання, ліцэнзійнага, аўтарскага права і гэтак далей. Пералічана практычна ўсё, акрамя крымінальнага права. Плюс яшчэ ангельская мова на высокім узроўні, пажадана яшчэ і нямецкая. І вось я, вывучаючы вакансію, думаю: ну колькі ж вы гатовыя плаціць такому спецыялісту?
– І як вы думаеце колькі? 600 рублёў. Я ўжо ўяўляю, якая там чарга стаіць да гэтага працадаўцы, – іранічна ўсміхаецца жанчына. – Ёсць нават вакансія на выпіску таварна-транспартных накладных з заробкам ад 200 рублёў, яна ўжо паўтара месяца мне трапляецца. Такія завышаныя патрабаванні ў працадаўцаў, напэўна, таму, што рынак працы перанасычаны.
Для спецыялістаў з досведам Алёна называе адэкватным заробак 1000–1500 рублёў. Але ні на гэтыя грошы, ні на меншыя яе не бяруць.
«Праблема ў тым, што мяне нават на сумоўі не клічуць»
З дыскрымінацыяй на рынку працы мянчанка сутыкаецца не ўпершыню. Яна ўжо праходзіла такое, калі нарадзіла першае дзіця. На дварэ былі 90-я, і маладых мамаў не бралі нікуды.
– Я тады ўжо добра ўмела працаваць на кампутары. На той час гэта быў рэдкі навык, – тлумачыць Алена. – Але як толькі працадаўцы даведваліся, што ў мяне ёсць маленькае дзіця, адразу адмаўлялі. Хоць мы жылі з бацькамі, і ў выпадку чаго было каму дагледзець.
Гэта значыць я і мае аднагодкі сутыкнуліся спачатку з праблемамі пры пошуку працы як маладыя мамы, а цяпер вось пачаўся другі этап – узрост.
– Упэўнена, што калі мяне будуць запрашаць на сумоўі, размаўляць са мной, правяраць мае навыкі, то які-небудзь варыянт знойдзецца. Але ж праблема ў тым, што мяне нават на сумоўі не клічуць. Як я разумею, маё рэзюмэ адкрываюць, бачаць узрост і альбо адразу адмаўляюць, альбо проста не адказваюць, – мяркуе суразмоўца.