У Індыі ўспыхнулі масавыя пратэсты праз закон аб грамадзянстве

• 14.12.2019, 20:06

Частка пратэстоўцаў выказвалася не толькі супраць закона, але і супраць магчымай хвалі міграцыі.

У горадзе Калькута індыйскага штата Заходняя Бенгалія ўспыхнулі масавыя пратэсты праз закон аб удакладненні грамадзянства, у выніку чаго загінулі два чалавекі. Пра гэта паведамляе ВВС.

Паліцыя паведаміла пра дваіх загінулых у выніку агнястрэльных раненняў, 25 параненых пратэстоўцаў і 50 траўмаваных паліцэйскіх. Яшчэ 85 дэманстрантаў былі арыштаваныя і тысячы затрыманыя.

Закон аб удакладненні грамадзянства прадугледжвае, што немусульманскія ўцекачы з Афганістана, Пакістана або Бангладэша, якія збеглі ад рэлігійных пераследаў у Індыю да 2015 года, маюць права атрымаць грамадзянства краіны. Такое права не залежыць ад таго, ці трапілі яны ў Індыю законна ці не.