Ва Украіне мэру Львова ўручылі паведамленне пра падазрэнні ва злоўжыванні ўладай

• 21.11.2019, 17:45

Андрэй Садовы заявіў, што ягоныя адвакаты рыхтуюцца да абароны.

Супрацоўнікі Спецыялізаванай антыкарупцыйнай пракуратуры 21 лістапада ўручылі паведамленне аб падазрэнні мэру Львова Андрэю Садоваму. Пра гэта Садовы заявіў у відэазвароце ў Facebook, піша «Гордон».

«Толькі што пракуроры [кіраўніка САП Назара] Халадніцкага ўручылі мне паведамленне пра падазрэнні. Пра што ідзе гаворка? У 2015 годзе горад Львоў на адкрытым конкурсе прыцягнуў інвестара - кампанію СТР. Мы атрымалі ад гэтай кампаніі 54 млн грн за зямлю... На гэтым полі кампанія павінна пабудаваць індустрыяльны парк. Пачынаючы з 2015-2016 гадоў і далей - блакаванне з усіх бакоў. На ўзроўні дзяржаўнай улады, Генеральнай пракуратуры... Кампанія СТР мае намер стварыць у Львове 3 тысячы рабочых месцаў...з 2016 года пракуроры ездзяць, даследуюць...зямля стаіць», - заявіў Садовы.

Ён падкрэсліў, што ягоныя адвакаты рыхтуюцца да абароны.

Крыніцы «Українських навін» у праваахоўных органах паведамілі, што Садовага падазраюць паводле ч.2 арт.364 (злоўжыванне ўладай або службовым становішчам) Крымінальнага кодэкса Украіны.

Суразмоўца «Украінскай праўды» распавёў, што зямлю Садовы прадаў у Львоўскай вобласці, у той час як парк павінен быў быць у межах горада. «У праваахоўнікаў ёсць высновы Дзяржаўдытслужбы, заключэнне экспэрта, паказанні сведак, якія нават звольніліся з працы, каб не падпісваць незаконныя пастановы», - адзначыла крыніца.

Садовы - мэр Львова з 2006 года, лідар партыі «Самопоміч».