ЕЗ створыць уласную СПА і СРА з касмічнымі кампанентамі

• 12.11.2019, 20:30

У рэалізацыі праекту будуць удзельнічаць пяць краін.

Еўразвяз зацвердзіў праект стварэння ўласнай супрацьпаветранай і супрацьракетнай сістэмы з касмічнымі кампанентамі (TWISTER) для адбіцця паветраных пагроз апошняга пакалення. Пра гэта гаворыцца ў аўторак, 12 лістапада, у выніковай заяве Рады ЕЗ на ўзроўні міністраў абароны, паведамляе korrespondent.net.

Праект сістэмы TWISTER увайшоў у спіс з 13 новых вайсковых праектаў, прынятых у рамках праграмы структурнага вайсковага партнёрства ЕЗ (PESCO).

«Праект сістэмы Своечасовага папярэджання і перахопу з касмічнымі кампанентамі назірання зацверджаны 12 лістапада 2019 года. У яго рэалізацыі ўдзельнічаюць Францыя, Італія, Гішпанія, Нідэрланды і Фінляндыя», - гаворыцца ў дакуменце.

Раней паведамлялася, што ЕЗ стварае новы абаронны і касмічны аддзел. Генеральны дырэктарат будзе займацца пытаннямі абароны, прамысловасці і космасу для дапамогі ў фінансаванні, развіцці і разгортванні ўзброеных сіл.