ФСБ пачне блакаваць тэлефонную сувязь Расеі са светам
- 25.10.2019, 18:17
Блакаванне будзе тычыцца як галасавой сувязі, так і перадачы інфармацыі.
Рабочая група прадстаўнікоў ФСБ, Мінкамсувязі, ФАС і мабільных аператараў на даручэнне Савета бяспекі Расеі падрыхтавала пакет прапаноў у барацьбе з тэлефонным тэрарызмам і махлярствам, паведамляе finanz.ru.
Для «павышэння эфектыўнасці барацьбы з загадзя ілжывымі паведамленнямі аб тэрактах» чыноўнікі прапануюць абавязаць аператараў блакаваць на патрабаванне ФСБ тэлефонны трафік у кірунку пэўнай краіны, калі з яе тэрыторыі будуць паступаць ашуканскія званкі аб мінаванні.
Блакаванне будзе ўводзіцца на тэрмін да 180 дзён і будзе тычыцца як галасавой сувязі, так і перадачы звестак у кірунку пэўнай краіны ці іншага аператара сувязі, распавёў РБК адзін з удзельнікаў рабочай групы.
Інфраструктура аператараў цяпер мультысэрвісная: абодва тыпы трафіку перадаюцца па адных і тых жа каналах, блакаваць іх паасобку даволі праблематычна, тлумачыць ён. Акрамя таго, у ФСБ ёсць інфармацыя аб тым, што званкі з пагрозамі паступаюць пераважна з сэрвісаў фармату Skype Out і Viber Out, якія дазваляюць здзейсніць званок з кампутарнай праграмы на нумары агульнага карыстання.
«Праблема з тэлефонным тэрарызмам стаіць даволі востра, таму першачарговая задача была ў тым, каб знайсці хуткае і эфектыўнае развязанне», - дадае крыніца РБК.
Топ-мэнэджар аднаго з аператараў, якія ўдзельнічалі ў абмеркаванні, адзначае, што «склалася адназначнае ўражанне, што ФСБ хоча атрымаць магчымасць блакаваць і голас, і перадачу інфармацыі». Яшчэ двое ўдзельнікаў рабочай групы сцвярджаюць, што гаворка ідзе ў першую чаргу пра магчымасць блакавання менавіта галасавой сувязі і СМС.
«Ніхто наўпрост не казаў пра адключэнне усяго канала сувязі. Хіба што аператар будзе такі «крыварукі», што не зможа заблакаваць «голас» без блакавання перадачы звестак», - кажа адзін з суразмоўцаў.
У накіраваным пакеце дакументаў няма ўдакладненняў - які менавіта тып трафіку павінен блакавацца. У тлумачальнай запісцы да законапраекта толькі адзначана, што цяпер у аператараў прадугледжаны абавязак спыняць паслугі сувязі для асобных абанентаў (п.3 арт.64 закона «Аб сувязі»), але гэтага «захаду недастаткова для стрымання выклікаў тэрарыстычнай накіраванасці».
Даручэнне прапрацаваць змены ў заканадаўстве і для барацьбы з тэлефонным тэрарызмам, гэта значыць, з вялікай колькасцю ілжывых званкоў, напрыклад, з паведамленнямі аб мінаванні будынкаў, Мінкамсувязі і ФСБ даў Савет бяспекі.
У міжведамасную працоўную групу ўвайшлі прадстаўнікі 12-га Цэнтра ФСБ (курыруюць тэхнічныя мерапрыемствы на сетках сувязі і, напрыклад, удзельнічалі ў працэсе блакавання Telegram), Мінкамсувязі, Раскамнагляду, Федэральнай антыманапольнай службы (ФАС), аператараў «вялікай чацвёркі» («Растэлекам», МТС, «Мегафон» і «Вымпелкам») і аналітычны цэнтр «Форум», старшынём якога з'яўляецца экс-кіраўнік адміністрацыі прэзідэнта Аляксандр Валошын.