«Квартал 95» пажартаваў пра падпал дома экс-кіраўніцы Нацбанка Украіны Гантаровай
- 21.10.2019, 9:56
Нумар раскрытыкавалі міністры эканомікі і культуры.
У эфіры «Вечернего квартала» праспявалі жартоўную песню пра спаленне дома былой кіраўніцы Нацбанка Украіны Валерыі Гантаровай, паведамляе hromadske.ua.
Відэа з песняй апублікаванае на ютуб-канале «Квартал 95».
Вядоўца нумара Сцяпан Казанін назваў спаленне дома «яркай падзеяй», пасля чаго на сцэну выконваць песню выйшлі жанчыны Нацыянальнага заслужанага акадэмічнага ўкраінскага народнага хору імя Рыгора Вяроўкі і гумарыст Яўген Кашавы.
Яны праспявалі «Гарэў дом, палаў, у Лондане жанчына плакала» – Гантарова цяпер жыве ў Лондане.
Акрамя гэтага, у песні гаворыцца, што выратавальнікі пяклі шашлыкі, а «мараль простая – дом згарэў ад сораму». Таксама ёсць такая фраза – «Людзі агонь ўбачылі – дапамагаць пачалі, вёдры схапілі і прыбеглі, у агонь салярку плёскалі».
З крытыкай нумара выступілі міністр эканомікі Украіны Цімафей Мілаванаў, а міністр культуры Уладзімір Барадзянскі папрасіў прабачэння перад Гантаровай.