«Дурань заўсёды пышыцца сваімі майбахамі і рэзідэнцыямі»
- Андрэй Ісакаў, «Баста»
- 20.10.2019, 22:05
Беларусы не будуць вяртаць пазыкі дзіўнага чалавека з сумнеўнымі перспектывамі.
Лукашэнка і ягоныя памагатыя ўжо даўно не саромеюцца дэманстраваць раскошу, у якой яны жывуць. Рэзідэнцыі, «Майбахі», прыбіральні і жырандолі за сотні тысяч даляраў. Дурань заўсёды пышыцца сваім багаццем, інакш яно яму не надта і трэба. Дый хаваць яго ўжо складана. Галоўны дурань падае прыклад астатнім. Калі рэзідэнцый - то 17, калі бронелімузін - то самы дарагі. Калі парад - то каб асфальт дрыжаў. Нават, памятаецца, пра другую АЭС заікаўся, калі яшчэ пад першую падмурак не залілі.
Беларусы бачаць усё гэта і першае, пра што думаюць - гэта пра кошт дыктатарскіх цацак. Пацёмкінскія вёскі і цалкам рэальныя рэзідэнцыі Лукашэнкі, сапраўды, каштуюць вельмі дорага. Таксама, як і небяспечныя праекты, пад якія ён старанна браў крэдыты то ў Расеі, то ў Кітая. Не так даўно было падлічана, што кожны з нас вінен лукашэнкавым крэдыторам амаль 5 тысяч даляраў. Тысяча з іх - за АЭС у Астраўцы, дарэчы.
Напраўду, гэта не так.
Уся штука ў тым, што з моманту, калі Лукашэнка са сваёй хеўрай узурпаваў уладу шляхам так званага "рэферэндуму" 1996 года, ва ўладзе ён знаходзіцца незаконна, усе наступныя выбары – фальшаваныя, і ягоны подпіс нічога не варты і не значыць.
Беларусы не будуць вяртаць пазыкі Лукашэнкі.
Калі не стане дыктатуры і крэдыторы патрабуюць ад улад свабоднай Беларусі вярнуць грошы, якія раней атрымаў злачынец, яны, напэўна, выявяць шчырае здзіўленне. Скажуць, што іх не папярэджвалі.
Папярэджваем: вы пазычаеце грошы не прэзідэнту Беларусі, а звычайнаму яе грамадзяніну з няяснымі крымінальнымі перспектывамі. Закон ёсць закон, і ніхто не мае права яго парушаць, а пагатоў - патураць яго парушэнню і рабіць выгляд, што ўсё нармальна.
Андрэй Ісакаў, «Баста»