Віцэ-міс «Краса Расеі» трапіла ў ДТЗ пад Менскам
- 13.10.2019, 19:53
Грузавік сутыкнуўся з аўто, у якой знаходзілася Яўгенія Смятаніна.
Ураджэнка Тамбова Яўгенія Смятаніна, якую ў 2017 годзе прызналі першай віцэ-міс у конкурсе «Краса Расеі», атрымала сур'ёзныя пашкоджанні ў аварыі, якая адбылася пад Менскам. Пра гэта паведамляе РІА «Новости».
Як стала вядома, ДТЗ здарылася яшчэ 5 верасня 2019 года.
Паводле наяўнай інфармацыі, грузавік сутыкнуўся з аўтамабілем, у якім знаходзілася Смятаніна.
Паведамляецца, што дзяўчына атрымала шматлікія траўмы.
Як вядома, у выніку аварыі ёй раздрабніла плячо. Акрамя таго, у дзяўчыны пералом абедзвюх ключыц, а таксама пальцаў правай рукі, ног.
На гэты момант Смятаніна аднаўляецца ад атрыманых траўмаў. Дзяўчыне патрэбныя яшчэ шэраг аперацый.