Грэцкая царква прызнала права Канстанцінопаля даваць аўтакефалію Украіне
- 12.10.2019, 18:53
Гэта рашэнне адкрывае магчымасці для яе супрацоўніцтва з Праваслаўнай царквой Украіны ва ўсіх сферах.
Праваслаўная царква Грэцыі прызнала аўтакефалію Праваслаўнай царквы Украіны. Адпаведнае рашэнне было прынятае на пазачарговым саборы іерархаў грэцкай царквы 12 кастрычніка, паведаміў у Facebook звершнік ПЦУ мітрапаліт Епіфаній, піша gordonua.com.
«Удзячны майму брату ў Хрысце, на чале Святога сінода царквы Грэцыі Добраславеннаму архіепіскапу Афінскаму і ўсёй Элады Іераніму і братам архірэям, якія сёння на пасяджэнні сабора іерархаў падтрымалі пазіцыю і пайшлі следам кананічным і гістарычным рашэнням Сусветнага патрыярхату, што адкрывае магчымасць паўнавартаснага ўзаемадзеяння паміж дзвюма нашымі памеснымі аўтакефальнымі цэрквамі ва ўсіх сферах», - напісаў ён.
Епіфаній адзначыў, што Грэцыю і Украіну аб'ядноўвае «шмат старонак гісторыі, дружбы і супрацоўніцтва».
«Усталяванне поўнага еўхарыстычнага яднання і афіцыйных стасункаў паміж памеснымі цэрквамі Грэцыі і Украіны - яшчэ адна старонка, якая навекі будзе ўпісаная ў нашу гісторыю і нашы сэрцы!» - дадаў ён.
Арцыбіскуп ПЦУ Яўстрацій паведаміў у Facebook, што, паводле папярэдняй інфармацыі, за прызнанне аўтакефаліі ПЦУ прагаласавала 72 удзельніка сабора, трое аддалі галасы супраць.
Праваслаўная царква Украіны была створаная на аб'яднальным саборы 15 снежня 2018 года, у якім узялі ўдзел усе архірэі Украінскай праваслаўнай царквы Кіеўскага патрыярхату і Украінскай аўтакефальнай праваслаўнай царквы, а таксама два архірэі Украінскай праваслаўнай царквы Маскоўскага патрыярхату. 5 студзеня 2019 года сусветны патрыярх Варфаламей падпісаў томас аб аўтакефаліі ПЦУ, а 6 студзеня ўручыў яго звершніку ПЦУ мітрапаліту Епіфанію ў Стамбуле.