Балгарыя падпісала пагадненне з Грэцыяй для скарачэння газавай залежнасці ад РФ

• 10.10.2019, 19:55

Пагадненне дазволіць Балгарыі палепшыць доступ да прыроднага газу з Каспійскага мора.

Грэцкі міністр навакольнага асяроддзя і энэргетыкі Костыс Чацідакіс і яго балгарская калега Тэменужка Петкова 10 кастрычніка падпісалі пагадненне пра газавы інтэрканектар Грэцыя-Балгарыя (IGB).

Пра гэта паведамляе «Европейская правда» са спасылкай на EUobserver.

Гэты праект коштам 240 млн еўраў, які часткова фінансуецца ЕЗ, дазволіць Балгарыі палепшыць доступ да прыроднага газу з Каспійскага мора.

Еўрапейскі інвестыцыйны банк у чацвер ухваліў крэдыт на 110 млн еўраў на будаўніцтва газаправода даўжынёй 182 км, які злучыць Балгарыю з Грэцыяй.

Балгарыя, якая цяпер задавальняе ўсе свае запатрабаванні газам з Расеі, спадзяецца, што трубаправод са штогадовай магутнасцю 3 млрд куб. м. пачне функцыянаваць да канца 2020 года і будзе транспартаваць пераважна азербайджанскі газ у балканскую краіну пасля злучэння з Трансадрыятычным газаправодам (TAP) у Грэцыі.

IGB на 50% належыць дзяржаўнай кампаніі Балгарыі BEH. Астатнія акцыі трымаюць грэцкую DEPA і італьянскую «Эдысан».

Пасля 2020 года Балгарыя плануе задавальняць да 30% сваёй патрэбнасці ў прыродным газе з азербайджанскага радовішча «Шах-Дэніз II» транзітам праз тэрыторыю Грэцыі. Цяпер Балгарыя амаль цалкам залежыць ад паставак расейскага газу, які транспартуецца праз украінскую газатранспартную сістэму і тэрыторыю Румыніі.

Мяркуецца, што пасля 2019 года Балгарыя будзе атрымліваць расейскі газ праз газаправод «Турэцкая плынь», які пракладваюць па дне Чорнага мора.