Палякі распрацавалі першы ў свеце стэтаскоп са штучным інтэлектам

• 31.01.2019, 21:55

Стэтаскоп здольны здзейсніць рэвалюцыю ў медыцыне.

У Познані распрацаваны першы ў свеце стэтаскоп, абсталяваны штучным інтэлектам, які здольны здзейсніць рэвалюцыю ў медыцыне, паведамляе «Радио Польша».

Прылада пад назвай StethoMe прызначаная для выкарыстання ў хатніх умовах. Як і традыцыйны стэтаскоп, ён выкарыстоўваецца для ацэнкі функцыянавання дыхальнай сістэмы, але адрозніваецца тым, што запісвае, ідэнтыфікуе і класіфікуе атрыманыя гукі.

Прылада падлучаная да дадатку на смартфоне, які падказвае, у якія месцы на грудзях прыкладаць прыладу падчас тэсту. Пасля завяршэння працэдуры карыстальнік атрымлівае заключэнне аб магчымых адхіленнях, і пры неабходнасці рэкамендацыю звярнуцца да лекара. Лекар, у сваю чаргу, атрымлівае аўдыё-візуальнае заключэнне, што дапамагае яму паставіць канчатковы дыягназ.

Выхад StethoMe на рынак у Польшчы і за мяжой чакаецца ў 2020 годзе. На гэты момант прылада тэстуецца ў 10 краінах свету, уключаючы Вялікабрытанію, Швецыю, Грэцыю, Мексіку, Італію, Партугалію, Нямеччыну.