Макрон: Я вітаю адвагу тысяч венесуэльцаў

• 24.01.2019, 14:21

Прэзідэнт Францыі падтрымаў аднаўленне дэмакратыі ў Венесуэле.

Прэзідэнт Францыі Эмануэль Макрон у каментары выступаў 24 студзеня супраць дыктатара Мадура, напісаў, што «вітае адвагу тысяч венесуэльцаў, якія выступаюць за сваю свабоду». Тое, што адбываецца ў краіне, ён назваў аднаўленнем дэмакратыі, паведамляе RFI.

«Пасля нелегітымных выбараў Нікаласа Мадура ў траўні 2018 года Еўропа падтрымлівае аднаўленне дэмакратыі. Я вітаю адвагу сотняў тысяч венесуэльцаў, якія выступаюць за сваю свабоду», - напісаў у сябе ў твітэры Эмануэль Макрон.

Раней кіраўніца еўрапейскай дыпламатыі Федэрыка Магерыні ад імя 28 краін Еўразвяза заклікала ўлады Венесуэлы пачуць «голас народа» і правесці свабодныя выбары. «Народ Венесуэлы мае права выходзіць на мірныя дэманстрацыі, свабодна выбіраць сваіх кіраўнікоў і вызначаць сваю будучыню. Ягоны голас павінен быць пачуты», - заявіла Магерыні.