Лідар апазіцыі Венесуэлы абвясціў сябе часовым прэзідэнтам

• 23.01.2019, 21:22

Прэзідэнт ЗША плануе падтрымаць Хуана Гуайда на часовай пасадзе.

Лідар апазіцыйнай Нацыянальнай асамблеі Венесуэлы Хуан Гуайда абвясціў сябе прэзідэнтам краіны, паведамляе Associated Press.

Нацыянальная асамблея абвясціла Гуайда выканаўцам абавязку прэзідэнта Венесуэлы, удакладняе AFP.

Раней тэлеканал CNN са спасылкай на крыніцы паведаміў, што прэзідэнт ЗША Дональд Трамп збіраецца прызнаць Гуайда легітымным лідарам Венесуэлы, калі той абвесціць сябе прэзідэнтам.

У сераду на прызыў Гуайда ў Венесуэле пачаліся масавыя выступы супраць дыктатара Нікаласа Мадура.

Хуан Гуайда назваў Мадура ўзурпатарам і заявіў, што гатовы часова ўзяць на сябе прэзідэнцкія паўнамоцтвы (канстытуцыя прадугледжвае гэта ў выпадку немагчымасці выканання абавязкаў прэзідэнтам).