Ізраіль знішчыў расейскі «Панцыр» у Сірыі
- 21.01.2019, 11:59
ЦАХАЛ нанёс удары па пазіцыях іранскага элітнага падраздзяленне.
Войска абароны Ізраіля нанесла ўдары па пазіцыях «Аль-Кудс» - элітнага падраздзялення ў складзе іранскага Корпуса вартавых ісламскай рэвалюцыі на тэрыторыі Сірыі. У выніку атакі загінулі мінімум чатыры чалавекі, паведамляе BBC.
Сірыйскія СМІ паведамляюць, што большасць ізраільскіх ракет былі збітыя. У сваю чаргу Ізраіль заявіў, што гэта адбылося пасля таго, як сілы Кудса ў нядзелю запусцілі ракету з Сірыі над Галанскімі вышынямі. Ракету атрымалася перахапіць.
Войска абароны Ізраіля абвясціла аб пачатку аперацыі ў сваім Twitter раніцай у панядзелак.
Расейскія вайскоўцы, якія падтрымліваюць сірыйскі ўрад, кажуць, што было знішчана больш за 30 ізраільскіх ракет. Яны таксама паведамляюць, што чацвёра сірыйскіх жаўнераў былі забітыя ў выніку авіяўдару, нацэленага на аэрапорт.
Пазней Сірыйская абсерваторыя правоў чалавека заявіла, што ізраільскія ракеты знішчылі склады зброі і вайсковыя аб'екты, якія належаць Ірану і руху «Хезбала», які падтрымліваецца Іранам.
У сваю чаргу Войска абароны Ізраіля апублікавала відэа знішчэння расейскага комплексу СПА «Панцыр-С1».
Нагадаем, 13 студзеня ізраільскі прэм'ер-міністр Біньямін Нетаньяху заявіў, што Ізраіль дзеля прадухілення вайсковага ўмацавання Ірана ў Сірыі гатовы нарошчваць атакі на іранскія аб'екты ў суседняй краіне.