Лідары Аргенціны і Бразіліі прызналі Мадура дыктатарам

• 16.01.2019, 20:28

Маўрысіа Макры і Жаір Балсанару наважылі ўзмацніць ціск на кіраўніка Венесуэлы.

Прэзідэнты Аргентыны і Бразіліі Маурысіа Макра і Жаір Балсанару паводле вынікаў праведзенай у сераду сустрэчы наважылі ўзмацніць ціск на кіраўніка Венесуэлы Нікаласа Мадура, паведамляе svoboda.org са спасылкай на агенцтва Reuters. Абодва лідары заявілі, што ўважаюць Мадура дыктатарам.

Падчас свайго візіту ў сталіцу Бразіліі, аргентынскі лідар патлумачыў пастанову не прызнаваць уладу Мадура тым, што некалькі краін, у тым ліку ЗША, ужо адмовіліся ўважаць яго легітымным лідарам Венесуэлы.

Прэзідэнт Аргенціны таксама асудзіў заключэнне многіх прадстаўнікоў венесуэльскай апазіцыі і заявіў, што ўважае сфальсіфікаванымі вынікі прэзідэнцкіх выбараў, на якіх перамог Мадура.

У аўторак амерыканскі тэлеканал CNN паведаміў, што ЗША разглядаюць магчымасць прызнання кіраўніка апазіцыйнага парламента Венесуэлы Хуана Гуаіда легітымным прэзідэнтам краіны замест Нікаласа Мадура. Крыніцы тэлеканала таксама распавялі, што ў Вашынгтоне не выключаюць узмацнення санкцый супраць Каракаса. Між іншым не выключаецца ўвядзенне поўнага эмбарга на венесуэльскую нафту.

ЗША і дзяржавы Лацінскай Амерыкі раней ужо называлі Нікаласа Мадура ўзурпатарам. Палітыка крытыкуюць за парушэнні правоў чалавека.

У Венесуэле не спыняецца гуманітарны крызіс. У 2018 годзе эканамічнае становішча краіны працягвала пагаршацца: паказчык інфляцыі ў Венесуэле перавысіў адзнаку аднаго мільёна працэнтаў за год. У большасці гарадоў назіраецца недахоп тавараў паўсядзённага карыстання, мільёны людзей эмігравалі з краіны ў пошуках працы.