У Мюнхене знайшлі копію ліста Альберта Эйнштэйна

• 8.09.2018, 13:52

Гэты ліст Альберт Эйнштэйн напісаў у 1932 годзе, каб павіншаваць з 50-годдзем габрэйскага эканаміста Юліуса Хірша.

Як паведамляе dw.com, арыгінал ліста захоўваецца ў Інстытуце імя Леа Бека ў Нью-Ёрку.

Цяпер у архіве Габрэйскай абшчыны Мюнхена была выяўленая копія, зробленая самім лаўрэатам Нобелеўскай прэміі пад капірку. Яна была сярод газетных выразак 1961 года з некралогамі, апублікаванымі пасля смерці Хірша.

Копія ліста, знойдзеная ў Мюнхене, мяркуючы з гэтага, заставалася ў Эйнштэйна. Як яна аказалася ў мюнхенскім архіве, пакуль высветліць не ўдалося.

Пасля прыходу да ўлады нацыянал-сацыялістаў у 1933 годзе Юліус Хірш (1882-1961) эміграваў у Данію, а затым у 1941 годзе пераехаў у ЗША. У 1952 годзе ў сувязі з 70-годдзем яму было прысвоенае званне ганаровага доктара Бэрлінскага свабоднага ўніверсітэта, у якім ён выкладаў да эміграцыі.