Журналіст tut.by Дзмітрый Бобрык: Падчас допыту ў СК мяне шантажом завербавалі

• 25.09.2018, 20:01

Журналіст прызнаўся ў вярбоўцы спецслужбамі падчас допыту паводле «справы БелТА».

Журналіст tut.by Дзмітрый Бобрык прызнаўся ў сваім Facebook, што падчас допыту ў Следчым камітэце паводле «справы БелТА» яго шантажом завербавалі.

Дзмітрый Бобрык паведаміў, што пасля трохгадзіннага ператрусу ў кватэры 7 жніўня яго адвезлі ў цэнтральны апарат Следчага камітэта. Тут у адрас журналіста і яго сваякоў паступалі прамыя пагрозы.

«Разумею, што агучаныя мной факты могуць быць непрыемныя маім родным, блізкім і сябрам. Я не хацеў гаварыць пра гэта, але сітуацыя вымушае гэта зрабіць.

Пасля трохгадзіннага ператрусу ў кватэры 7 жніўня мяне адвезлі ў цэнтральны апарат Следчага камітэта. Менавіта ў будынку СК, дзе мяне пратрымалі да позняга вечара, я праявіў слабасць, збаяўся. Тут у адрас паступалі прамыя пагрозы - у мой адрас, і ў адрас маіх родных і блізкіх. Спачатку мне паабяцалі раскрыць дэталі асабістага жыцця, калі адмоўлюся ад супрацоўніцтва. А скончылася пагрозамі ў адрас родных, якія могуць пацярпець. Тут мяне закалаціла, мне пагражалі самым важным у жыцці. Я напісаў паперу аб супрацоўніцтве.

Яшчэ седзячы ў СК зразумеў, што не стану гэтага рабіць - супрацоўнічаць. Не змагу пасля гэтага глядзець на сябе ў люстэрка.

Пасля таго як стала зразумела, што атрымаць ад мяне якую-небудзь інфармацыю не атрымаецца, мяне адразу ж перавялі ў новы статус - падазраванага.

Пасля гэтага ціск узмацніўся.

Мне агідна ад таго, што мне не хапіла мужнасці седзячы ў СК адмовіцца ад супрацоўніцтва. Трохі супакойвае толькі тое, што хапіла сіл па факце не рабіць гэтага.

Мне давялося многае вытрымаць. Але не ведаю, якія выпрабаванні мяне чакаюць наперадзе, і не ведаю, ці хопіць мне сіл усё гэта вытрымаць, але маўчаць пра гэта я ўжо не магу. Баюся, што далей будзе аказвацца ціск на маіх родных, блізкіх, сяброў», - прызнаўся Дзмітрый Бобрык.

Нагадаем, пасля затрыманняў паводле «справы БелТА» галоўная рэдактарка сайта Charter97.org Наталля Радзіна папярэджвала, што журналістаў, хутчэй за ўсё, «ламаюць» на падпіску аб супрацоўніцтве са спецслужбамі.