Сёння Літва і Латвія адзначаюць Дзень адзінства балтаў

• 22.09.2018, 16:28

Свята адзначаюць і жыхары Беларусі.

22 верасня ў Латвіі і Літве адзначаецца Дзень адзінства балтаў. Альбо Дзень балтыйскага адзінства.

Адзначаецца ён у гонар бітвы пры Саўле. Яна апісваецца ў Лівонскай рыфмаванай хроніцы: 22 верасня 1236 года жамайты і земгалы - продкі літоўцаў і латышоў - разграмілі войскі Ордэна мечаносцаў.

Дзе менавіта адбывалася бітва - дакладна невядома. Адны мяркуюць, што каля сучаснага літоўскага горада Шаўляю, іншыя - што каля латвійскага пасёлка Вецсаўле.

Свята ў гэты дзень адзначаецца з 2000 года.

Свята адзначаецца і беларусамі. Летась вогнішчы ў гонар свята яднання балтаў запалілі ў 20 месцах Беларусі.

Свята адзначаецца ў дзень восеньскага раўнадзенства. У народнай традыцыі гэта час падвядзення вынікаў і падліку таго, што зроблена за актыўны летні перыяд. З гэтым звязаная і традыцыя запальвання вогнішча.