Будучы стадыён Чыжа канчаткова аддалі кітайцам

• 21.09.2018, 18:22

Адпаведны ўказ падпісаў Лукашэнка.

Лукашэнка даў згоду на атрыманне ад кітайцаў тэхніка-эканамічнай дапамогі на праекты «Нацыянальны футбольны стадыён» і «Басейн міжнароднага стандарту».

Нагадаем, што ўрады Беларусі і Кітая дамовіліся пра суму 800 млн юаняў (прыкладна $117 млн). Як раз частка гэтых грошай і пойдзе на стадыён і басейн. Дакументы ў гэтых двух праектах падпіша Міністэрства эканомікі, піша office life.

Згода ад Лукашэнкі атрыманая пасля сустрэчы з членам Пастаяннага камітэта Палітбюро ЦК Кампартыі КНР, сакратаром Цэнтральнай камісіі Кампартыі па праверцы дысцыпліны Чжао Лэцзі, які негалосна курыруе бізнэс-асяроддзе ў Кітаі.

Гэты высокапастаўлены кітайскі функцыянер таксама сустрэўся з Міхаілам Мясніковічам.

Мясніковіч падзякаваў кітайскаму боку за інвестыцыі ў футбольны стадыён і басейн. Ён уважае, што «ўвод у эксплуатацыю гэтых аб'ектаў стане знакавай падзеяй у двухбаковых стасунках».

Паводле ўказу Лукашэнкі, стадыён пабудуюць на вуліцы Ванеева ў Менску побач з ужо існуючым «Трактарам». Заказчыкам будзе не кітайская кампанія, а УКБ Заводскага раёна. Генеральная праектная арганізацыя - Мінскінжпраект.