Раскамнагляд не знайшоў падстаў для блакавання «Яндэкс.Відэа»
- 31.08.2018, 11:41
Сэрвіс не будзе заблакаваны праз скаргі праваўладальнікаў.
Раскамнагляд не знайшоў падстаў для блакавання сэрвісу «Яндэкс.Відэа». Пра гэта паведамілі РБК у прэс-службе ўстановы.
«Праверка, праведзеная спецыялістамі Раскамнагляду, паказала, што падставы для абмежавання доступу да сэрвісу «Яндэкс.Відэа» цяпер адсутнічаюць», - падае агенцтва паведамленне ўстановы.
Пра тое, што сэрвісу пагражае блакаванне, стала вядома 28 жніўня. Масгарсуд абавязаў «Яндэкс.Відэа» прыняць забеспячальныя захады паводле скаргі чатырох тэлеканалаў холдынгу «Газпрам-Медыя» («2х2», ТНТ, «Супер» і ТВ3), якія скардзіліся на пірацкі кантэнт, і патрабавалі выдаліць спасылкі на нелегальнае відэа - серыялы «Хатні арышт», «Па-за гульнёй», шоў «Містычныя гісторыі» і анімацыйны серыял «Асцярожна, зямляне».
Пасля гэтага «Яндэкс» надумаў выдаліць з пошуку спасылкі на старонкі з відэакантэнтам тэлеканалаў холдынгу «Газпрам-Медыя». У кампаніі патлумачылі, што не лічаць патрабаванні Раскамнагляду законнымі, бо «Яндэкс» не можа самастойна вызначыць, ці ёсць у канкрэтнага сайта правы на той ці іншы кантэнт, а, значыць, не аддзяляе легальны кантэнт ад нелегальнага і можа выдаліць спасылкі на рэсурсы, дзе кантэнт размешчаны самім праваўладальнікам.
Тым не менш блакаванне «Яндэкс.Відэа» магло б прывесці да недаступнасці ўсяго пошукавіка, бо большасць правайдэраў могуць блакаваць трафік толькі праз даменнае імя, якое для «Яндэкс.Відэа» выглядае як yandex.ru, паведамілі ў прэс-службе інтэрнэт-кампаніі. Таму была прынятая пастанова часткова выдаліць спасылкі для выканання забеспячальных захадаў, уведзеных Масгарсудом. «Мы будзем аспрэчваць іх у судзе», - дадалі ў «Яндэксе».
Пасля выдалення спасылак «Газпрам-Медыя» ад ідэі падаць у суд на «Яндэкс» не адмовіўся, заявіўшы, што пазоў аб абароне правоў на кантэнт «будзе пададзены ў тэрміны, прадугледжаныя законам». «У выпадку калі мы яго не пададзім, папярэднія забеспячальныя меры будуць скасаваны і пірацкі кантэнт можа зноў з'явіцца на «Яндэкс.Відэа», - патлумачылі свае дзеянні ў холдынгу.