Генеральны сакратар ААН прапанаваў увесці ў Газу ўзброены кантынгент
- 18.08.2018, 10:30
Антоніу Гутэрыш апублікаваў чатыры варыянты абароны мірнага насельніцтва Газы.
Як паведамляе newsru.co.il, першы з прапанаваных Антоніу Гутэрышам варыянтаў прадугледжвае ўвядзенне ў сектар Газы збройнага кантынгенту ААН для забеспячэння фізічнай бяспекі жыхароў сектара.
Другі варыянт – накіраванне ў сектар грамадзянскага камісара ААН з выключным мандатам маніторынгу бяспекі і ўзроўню жыцця жыхароў сектара і паўнамоцтвамі ўрэгулявання канфліктаў.
Абодва гэтыя варыянты патрабуюць адпаведнай пастановы Рады бяспекі ААН, прыняцце якой на гэты момант вельмі малаверагодна.
Трэці варыянт - пашырэнне дзеяння існых праграм ААН у сектары Газы і павышэнне іх эфектыўнасці.
Чацвёрты варыянт – накіраванне ў сектар дадатковых прадстаўнікоў ААН для адсочвання гуманітарнай сітуацыі, паляпшэння каардынацыі паміж структурамі і павышэння празрыстасці.
Пры гэтым Гутэрыш падкрэсліў, што найлепшым спосабам развязання праблем сектара Газы з'яўляецца мірнае ўрэгуляванне араба-ізраільскага канфлікту.