Праваабаронца - Лукашэнку: Вы выканалі абяцанае народу?

• 15.08.2018, 21:21

Аляксандр Хамратаў задаў нязручнае пытанне дыктатару.

Апошнія «прэзідэнцкія выбары» прайшлі ў 2015 годзе. Тры гады - гэта дастатковы тэрмін, каб даведацца, ці выканаў фаварыт ЦВК свае перадвыбарчыя абяцанні. Так думаў магілёўскі праваабаронца Аляксандр Хамратаў, калі ў жніўні сёлета звярнуўся ў адміністрацыю Лукашэнкіа, піша «Могилевская весна».

- Я хацеў даведацца, ці была ў Аляксандра Рыгоравіча перадвыбарчая праграма, і калі так, то ў чым яна заключалася, а таксама ці выкананы абяцанні, якія ён даваў народу. Калі не, то калі яны будуць выкананы, - распавёў Хамратаў.

Адміністрацыя Лукашэнкі адмовілася прама адказваць на пытанні. Аб выкананні абяцанняў Лукашэнкі яны прапанавалі даведацца магілёўцу са сродкаў масавай інфармацыі. Праўда, як заяўляе Хамратаў, у СМІ аб выкананні перадвыбарнай праграмы Лукашэнкі сёння няма ні слова:

- Я наогул не памятаю ніякай канкрэтнай праграмы ў Лукашэнкі. Толькі канстатацыю таго, што мы ўсе жывем добра і таксама будзе і надалей. У СМІ нічога не гаворыцца пра яго выкананыя абяцанні. Будзь, чым пахваліцца - яны б такі шанец не выпусцілі, - мяркуе праваабаронца.

Адказ ад Адміністрацыі Лукашэнкі ён расцэньвае як прыкмету зневажальнага стаўлення да грамадзяніна і адсутнасць канструктыўных довадаў на карысць палітыкі, якая праводзіцца Лукашэнкам.