Порт Антвэрпэна эвакуявалі
- 12.08.2018, 14:20
Абвешчанае надзвычайнае становішча.
У порце бельгійскага горада Антвэрпэн абвешчанае надзвычайнае становішча праз пажар на складзе хімікатаў.
Пра гэта паведамляе партал RTL.info.
Як паведамляецца, пажар пачаўся яшчэ ў суботу раніцай, аднак надзвычайнае становішча было ўведзенае толькі ў нядзелю.
Пажар успыхнуў у суботу на складзе памерам 6000 м2, запоўненым сульфідам нікелю. На падставе вымярэнняў, зробленых уладамі, была прынятая пастанова эвакуяваць судны і склады ў радыусе 1,8 км ад пажару. Таксама быў абмежаваны рух.
Адзначаецца, што дым можа пашкодзіць здароўю жыхароў суседніх паселішчаў Экерэн, Стаброке і Капелен – іх просяць пакінуць свае вокны зачыненымі. Таксама ўлады рэкамендуюць аўтамабілістам, якія праязджаюць непадалёк ад пажару, адключыць сістэму вентыляцыі ў машынах.
Працы ў тушэнні пажару яшчэ не закончаныя.