Рассельгаснагляд праінспектуе беларускіх вытворцаў шампіньёнаў

• 23.07.2018, 16:04

Тэрміны інспекцыі пакуль не вызначаныя.

Рассельгаснагляд рыхтуецца да правядзення інспекцыі беларускіх кампаній, якія вырошчваюць шампіньёны.

"Мы атрымалі з Беларусі ліст, у якім калегі заяўляюць, што гатовыя прыняць нашых інспектараў. Рыхтуемся", - паведамілі "Інтэрфаксу" ў прэс-службе Рассельгаснагляду.

Тэрміны інспекцыі пакуль не вызначаныя.

Як паведамлялася, Рассельгаснагляд з 24 ліпеня забараняе пастаўкі шампіньёнаў з Беларусі з тым, каб прадухіліць увоз грыбоў, выгадаваных у "санкцыйных" краінах. Падчас адной з праверак у партыі грыбоў, якія паступілі з Беларусі, была выяўленая польская прадукцыя.

Рассельгаснагляд удакладніў, што забарона будзе дзейнічаць да правядзення службовымі асобамі ўстановы інспектавання беларускіх прадпрыемстваў - вытворцаў шампіньёнаў.

Са звестак Рассельгаснагляду, у 2017 годзе з Беларусі ў РФ было ўвезена 10 674 тоны шампіньёнаў, у першай палове гэтага года - 8 211 тон.