Відэафакт: Дырэктара шклозавода «Нёман» затрымлівалі аўтаматчыкі

• 17.07.2018, 18:56

Дырэктар шклозавода быў затрыманы за хабар.

Супрацоўнікі галоўнага ўпраўлення барацьбы з арганізаванай злачыннасцю і карупцыяй МУС Беларусі Гарадзенскай вобласці затрымалі дырэктара шклозавода «Нёман».

На сайце прадпрыемства з Бярозаўкі на 16 ліпеня кіраўніком прадпрыемства ўказаны Уладзімір Аутка.

Як паведаміла прэс-служба МУС Беларусі, з довадамі ўчыненага злачынства разам з дырэктарам таксама затрыманы начальнік аднаго з упраўленняў завода.

МУС сцвярджае, што службовыя асобы атрымалі хабар ад прадстаўніка камерцыйнай структуры сумаю 2,4 тысячы і 1,2 тысячы даляраў адпаведна. Незаконнае ўзнагароджанне прадугледжвалася за арганізацыю прыярытэтных паставак фірме шклаваты.

Затрыманыя атрымлівалі хабары сістэматычна, сума залежала ад аб'ёму прадукцыі.

У дачыненні да службовых асоб шклозавода і прадстаўніка камерцыйнай структуры Следчы камітэт пачаў крымінальныя справы.

Тым часам у Беларусі набірае абароты так званая «справа медыкаў» - больш за 60 высокапастаўленых супрацоўнікаў медыцынскіх устаноў абвінавачваюцца ў сістэматычным атрыманні хабараў, многія з іх затрыманыя.