Мінсельгасхарч: Шкодны жук у Беларусі не выяўлены

• 12.07.2018, 20:36

Мінсельгасхарч адказаў Рассельгаснагляду.

Кукурузны жук у Беларусі ў 2018 годзе не знойдзены, пашкоджанняў пасеваў няма, паведаміў сёння журналістам намеснік міністра сельскай гаспадаркі і харчавання Уладзімір Гракун, піша БелТА.

«Нашая карантынная служба вядзе маніторынг пранікнення каранцінных аб'ектаў на тэрыторыю Беларусі і краін ЕАЭС. Што да кукурузнага жука, маніторынг праводзіцца шляхам устаноўкі ферамонных пастак паблізу межаў з дзяржавамі, дзе ён шырока распаўсюджаны, - гэта Украіна і Польшча. У 2009 годзе мы ўпершыню выявілі жука ў феромонавай пастцы на нашай тэрыторыі. Адразу ж былі прыняты адпаведныя захады, і мы не дапусцілі яго распаўсюджвання. З 2009 года прайшло ўжо амаль 10 гадоў, і за ўвесь гэты час не зарэгістравана пашкоджанняў пасеваў кукурузы гэтым жуком. Фіксаваліся толькі адзінкавыя выпадкі адлову жука на ферамонныя пасткі. А ў гэтым годзе кукурузны жук на тэрыторыі Беларусі наогул не быў знойдзены», - сказаў Уладзімір Гракун.

Калі кукурузнага жука знаходзілі ў ферамонавай пастцы, на гэтай тэрыторыі ўсталёўвалася карантынная фітасанітарная зона, у якой было забаронена вырошчванне кукурузы. «Прынятыя захады далі магчымасць прадухіліць распаўсюджванне жука па тэрыторыі Беларусі», - падкрэсліў намеснік міністра.

Рассельгаснагляд на гэтым тыдні запытаў інфармацыю аб наяўнасці на тэрыторыі Беларусі небяспечнага жука. Сёння Уладзімір Гракун пагутарыў з намесніцай кіраўніка Рассельгаснагляду Юліяй Швабаўскене і растлумачыў сітуацыю. «Таксама мы падрыхтавалі адпаведны ліст у Рассельгаснагляд», - дадаў ён.