У Берасці на Вяслярным канале вылавілі медуз

• 11.07.2018, 14:10

Як яны туды трапілі - загадка.

Супрацоўнікі берасцейскага абласнога цэнтра алімпійскага рэзерву ў веславанні на днях знайшлі ў акваторыі Вяслярнага канала медуз, паведаміў tut.by cпецыяліст у сувязях з грамадскасцю спортустановы Алег Голас.

Медуз заўважылі ля элінгаў на спуску да лодак і катэрам. Дзвюх асобін супрацоўнікі Вяслярнага канала вылавілі і змясцілі ў запоўненую вадой ёмістасць. Берасцейскія медузы маленькія. Дыяметр парасоніка складае блізу трох сантыметраў.

«Ніхто не верыў і нават выказаць здагадку не мог, што гэта праўда. Думалі, жарт нашых трэнераў», - распавёў Алег Голас.

Як трапілі медузы ў Вяслярны канал - загадка. Найбліжэйшым часам супрацоўнікі цэнтра алімпійскага рэзерву плануюць паказаць іх спецыялістам.