Леанід Кулакоў: Улады чыняць подласць, але вахта ў Курапатах трывае

• 11.07.2018, 9:06

Затрыманні і арышты не паўплываюць на дух абаронцаў народнага мемарыялу.

Абаронцы Курапатаў Дзяніс Урбановіч, Вольга Нікалайчык і Павел Севярынец выйшлі на волю пасля 10 дзён арышту.

Вызваленне актывістам наладзілі праз чорны выхад Цэнтра ізаляцыі правапарушальнікаў, каб не трапілі ў аб'ектыў камеры. Да таго ж у Паўла Севярынца пры гэтым канфіскавалі і растапталі рукапіс новага рамана «Беларусалім. Сэрца святла», напісаць 11 старонак якога ён паспеў падчас арышту.

«Улада, як заўсёды, подла паступае. Прачакалі каля трох гадзін, а яны іх вывозяць праз чорны ход, - заявіў belsat.eu актывіст «Еўрапейскай Беларусі» Леанід Кулакоў.

Са слоў актывіста, затрыманні і арышты не паўплываюць на дух абаронцаў ўрочышча і вахта ў Курапатах будзе трываць.