Адзінаросам забаранілі крытыкаваць пенсійную рэформу

• 22.06.2018, 20:01

Сакратар генсавета «Адзінай Расеі» заклікаў «падставіць» плячо Мядзведзеву.

Сакратар генсавета «Адзінай Расеі» Андрэй Турчак назваў недапушчальнай крытыку пенсійнай рэформы з боку сябраў партыі. Заява, як паведамляе РБК, прагучала на закрытым пасяджэнні фракцыі адзінаросаў у Дзярждуме ў пятніцу, 22 чэрвеня.

Турчак сказаў, што сябры «Адзінай Расеі» абавязаныя «падставіць плячо» кіраўніку партыі, прэм'еру РФ Дзмітрыю Мядзведзеву. Са слоў сакратара генсавета партыі, «электаральная задача - нівеліраваць вастрыню гэтага пытання», «падрыхтаваць змястоўную аргументацыю і з гэтым ісці ў народ» падчас паездак у рэгіёны.

Турчак звярнуў увагу на тое, што некаторыя сябры партыі, у тым ліку дэпутаты Дзярждумы, казалі аб нязгодзе з рэформай. «Партыя будзе ўважліва за гэтым сачыць, і па кожнай такой заяве будуць зробленыя адпаведныя высновы», - заявіў Турчак.

Што менавіта пагражае нязгодным, не ўдакладняецца. Імёнаў сакратар генсавета не назваў. Раней супраць пенсійнай рэформы выказвалася дэпутатка Наталля Паклонская - яна абяцала галасаваць супраць законапраекта.