Леанід Слуцкі, які згадаў імя Навальнага, сыходзіць з Першага канала

• 20.06.2018, 10:19

Экс-трэнер зборнай РФ у футболе не будзе каментаваць матчы ЧС.

Былы трэнер зборнай Расеі ў футболе Леанід Слуцкі паведаміў, што больш не будзе каментаваць на «Першым канале» матчы чэмпіянату свету, паведамляе «Радыё Свабода». Ён абвесціў пра гэта ў канцы трансляцыі матчу Расея – Егіпет. «На жаль для мяне, я заканчваю сваю працу на Першым канале».

17 чэрвеня Слуцкі згадаў у эфіры Першага канала імя апазіцыйнага палітыка Аляксея Навальнага. Падчас матчу Нямеччына – Мексіка каментатар Кірыл Дзяменцеў казаў пра гульню ў «навальны футбол». Слуцкі на гэта адрэагаваў заўвагай: «Навальны гуляе ў футбол? Ну, цікава было б зірнуць».

Ягоная рэпліка стала падставай для флэш-мобу ў сацсетках: карыстальнікі пачалі складаць іншыя палітычныя каментары, якія мог бы зрабіць Слуцкі ў эфіры.

Некаторыя тэлеграм-каналы паведамілі, што могуць адхіліць і Дзяменцева. Сам журналіст заявіў, што яму пра гэта нічога невядома і што яго на той момант ні ад якой працы не адхілялі.

Раней 19 чэрвеня стала вядома, што футбольныя матчы на Першым канале не будзе больш каментаваць і Васіль Уткін.