У АБСЕ раскрытыкавалі ўнясенне змяненняў у закон аб СМІ ў Беларусі
- 18.06.2018, 15:36
Прадстаўнік АБСЕ ў свабодзе СМІ Арлем Дэзір выступіў з заявай.
Прадстаўнік АБСЕ ў свабодзе СМІ Арлем Дэзір выказаў занепакоенасць зменамі ў беларускім заканадаўстве аб сродках масавай інфармацыі, паведамляе сайт АБСЕ.
«Прыняцце гэтых паправак пасылае трывожны сігнал аб свабодзе СМІ і плюралізме. Я заклікаю ўлады старанна перагледзець закон і прывесці яго ў адпаведнасць са стандартамі і абавязацельствамі АБСЕ ў дачыненні да свабоды выказвання меркаванняў і свабоды CМІ», - дадаў ён.
У АБСЕ асудзілі пункты законапраекта, якія тычацца абмежаванняў на заснаванне СМІ замежнікамі. Акрамя таго, папраўкі да закона даюць магчымасць Міністэрству інфармацыі строга кантраляваць усе онлайн-рэсурсы.
«Ніводнае міністэрства не павінна валодаць уладай для блакавання доступу да кожнага онлайн-рэсурсу без пастановы суда. Выдаленне кантэнту павінна патрабаваць судовага нагляду», - адзначыў Дэзір.
Уладальнікі вэб-рэсурсаў будуць абавязаныя «аналізаваць» увесь кантэнт, «бо закон патрабуе, каб яны неслі адказнасць за прадухіленне распаўсюду непраўдзівай інфармацыі, якая можа прычыніць шкоду дзяржаўным або грамадскім інтарэсам ці ганіць людзей або юрыдычных асобаў».
«Яны таксама нясуць адказнасць, калі іх рэсурсы выкарыстоўваюцца для распаўсюду інфармацыі або каментароў карыстальнікамі інтэрнэту, якія не прайшлі папярэднюю ідэнтыфікацыю, як гэта вызначана дзяржавай», - заявіў прадстаўнік АБСЕ.
«Многія з раздзелаў з'яўляюцца празмернымі і непрапарцыйнымі і могуць прывесці да абмежавання свабоды выказвання меркаванняў, у тым ліку да таго, што грамадзяне застаюцца ананімнымі ў інтэрнэце», - сказаў Дэзір.
Прадстаўнік АБСЕ заявіў, што закон працягвае забараняць замежным журналістам працаваць без акрэдытацыі ў МЗС, нягледзячы на заклікі ўправы прадстаўніка АБСЕ ў свабодзе СМІ спыніць гэтую практыку.
Нагадаем, што 19 красавіка так званая «палата прадстаўнікоў» прыняла скандальныя папраўкі да закона аб СМІ, якія канчаткова знішчаюць свабоду слова ў Беларусі. Папраўкі ўводзяць абавязковую рэгістрацыю інтэрнэт-рэсурсаў навін. Уладальнікі і рэпарцёры не зарэгістраваных інтэрнэт-рэсурсаў не прызнаюцца журналістамі, не маюць права на атрыманне і абарону крыніцы інфармацыі, а пры з'яўленні на масавых акцыях прыраўноўваюцца да дэманстрантаў.
Уводзіцца абавязковая ідэнтыфікацыя асобаў, якія размяшчаюць матэрыялы ці каментары на форумах, у інтэрнэт-рэсурсах». Гэта значыць, рэдактараў, якія працуюць у Беларусі інтэрнэт-СМІ будуць прымушаць здаваць спецслужбам звесткі сваіх журналістаў і чытачоў, якія пракаментавалі артыкул. Дапускаецца магчымасць блакавання сацыяльных сетак і абмежаванне доступу да інтэрнэт-рэсурсаў у пазасудовым парадку.
Экспэрты назвалі гэтыя папраўкі «ударам па незалежнай журналістыцы» і «новым закручваннем гаек».
Напярэдадні прыняцця паправак у закон аб СМІ ў Беларусі быў заблакаваны найбуйнейшы незалежны сайт Charter97.org.