Леанід Кулакоў: Улады баяцца, што мы будзем пратэставаць супраць прыезду Пуціна

• 18.06.2018, 12:48

У дом Вольгі Нікалайчык спрабуе трапіць міліцыя.

Актывістка і грамадская рэжысёрка Вольга Hікалайчык паведаміла «Белсату», што да яе ў акно грукаў міліцыянт. Звычайна такія візіты заканчваюцца затрыманнямі актывісткі.

Вольга Нікалайчык – адна з найбольш актыўных удзельніцаў акцыі пратэсту каля рэстарана «Поедем поедим». Актывістка, аднак, звязвае візіт праваахоўнікаў з прыездам у Менск Пуціна.

«[Пуцін] едзе ў Менск, так будуць ужо бадзяцца за мной», – напісала Нікалайчык у «Фэйсбуку».

«Вольга мяркуе, што яны баяцца, каб мы не выйшлі і не сказалі Пуціну сваё “фу”», – кажа актывіст грамадзянскай кампаніі «Еўрапейская Беларусь» Леанід Кулакоў, сябар Вольгі Нікалайчык.

Паводле словаў актывіста, ніякіх спецыяльных акцый, прымеркаваных да прыезду ў Менск кіраўніка Расеі, Вольга Нікалайчык не планавала.

У выніку міліцыянт сышоў, пакінуўшы Вользе позву.

Нагадаем, Пуцін наведае Менск з афіцыйным візітам 19 чэрвеня. Ён сустрэнецца з Лукашэнкам і возьме ўдзел у паседжанні «найвышэйшай дзяржаўнай рады» «саюзнай дзяржавы».