Пецярбургскі мост з надпісам «Газэль не праедзе» злавіў юбілейную ахвяру

• 27.05.2018, 21:06

У Пецярбургу 150-я машына затрымалася пад «мостам глупства».

У расейскім Санкт-Пецярбургу ўжо 150-я машына "Газэль" затрымалася пад нізкім мостам, дзе размешчаны папераджальны надпіс: "Небяспечна! Нізкі мост. Газэль не праедзе".

Як паведамляе ria.ru, трохпралётны шляхаправод, названы ў народзе "мостам глупства", пабудавалі ў 2011 годзе. Вышыня транспартнага сродку, здольнага прайсці пад ім, не павінна перавышаць 2,7 метра.

Адпаведныя папераджальныя знакі там ёсць. Нягледзячы на гэта, машыны даволі часта захрасаюць пад гэтым шляхаправодам. Цяпер мясцовыя ўлады плануюць пафарбаваць мост святлоадбівальнай фарбай, каб ён звяртаў дадатковую ўвагу кіроўцаў.