На Мсціслаўшчыне егер застрэліў мужчыну, прыняўшы яго за казулю

• 27.05.2018, 10:02

Егер парушыў тэхніку бяспекі.

На Мсціслаўшчыне ў лесе каля вёскі Басценавічы егер застрэліў паляўнічага, падумаўшы, што гэта казуля. 41-гадовы мужчына атрымаў рану ў галаву і памёр на месцы, паведамілі сёння ў прэс-службе Дзяржінспекцыі аховы жывёльнага і расліннага свету, піша telegraf.by.

Трагічнае здарэнне адбылося ўвечары 23 траўня. Егер Мсціслаўскай структуры БТПР кіраваў паляваннем на дзіка і казулю, у якім удзельнічалі двое паляўнічых і жыхар вёскі Белы Мох - ён і трапіў пад выпадковы стрэл.

Папярэдне выяўлена, што 41-гадовы мужчына знаходзіўся ў зарасніках малінніку, калі егер стрэліў па іх карцеччу, падумаўшы, што там хаваецца казуля. Паляўнічы загінуў.

Таксама ў Дзяржінспекцыі распавялі, што егер прызнаў, што парушыў тэхніку бяспекі палявання - стрэліў на шум, шоргат, па недакладна бачнай цэлі. Гэта катэгарычна забаронена Правіламі вядзення паляўнічай гаспадаркі і палявання.