Грузія зацвердзіла новую назву Літвы - Летува
- 25.05.2018, 15:19
Урад Грузіі зацвердзіў новую назву Літвы ў грузінскай мове.
Пра гэта піша «Еўрапейская праўда».
Новая назва больш дакладна адлюстроўвае вымаўленне назвы краіны на літоўскай мове. 4 траўня дзяржаўная камісія літоўскай мовы зацвердзіла альтэрнатыўны варыянт назвы Грузіі - Сакартвела. Змяніць традыцыйную назву папрасіла сама Грузія, бо сённяшнюю назву ўважаюць за русіфікаваную.
Міністэрства замежных спраў Грузіі абнародавала заяву, у якой гаворыцца, што «абедзве пастановы вельмі сімвалічныя, бо ў гэтым годзе Літва святкуе 100-годдзе аднаўлення дзяржаўнасці, у той час як у Грузіі адзначаюць 100-годдзе стварэння першай дэмакратычнай рэспублікі».
25 траўня прэзідэнтка Літвы Даля Грыбаўскайтэ прыбыла ў Тбілісі для ўдзелу ў святкаванні 26 траўня Дня незалежнасці Грузіі.