Баравы: Лондан дае зразумець, што пуцінскім агентам не месца ў Вялікай Брытаніі

• 22.05.2018, 17:36

Улады Вялікай Брытаніі не хочуць бачыць у сваёй краіне расейскіх бізнэсоўцаў, звязаных з Крамлём.

Такое меркаванне выданню "Гордон" выказаў расейскі апазіцыянер і палітычны экспэрт Канстанцін Баравы ў каментары публікацыі дакладу "Маскоўскае золата: расейская карупцыя ў Вялікай Брытаніі".

"Брытанцы напраўду вельмі занепакоеныя не станам дэмакратыі ў Расеі, а дзеяннямі крымінальных груповак, якіх фінансуюць расейскія алігархі. Іх хвалюе ўласная бяспека. Замах на экс-выведніка Сяргея Скрыпаля зрабіў на брытанцаў моцнае ўражанне. Лондан дае зразумець, што пуцінскім агентам не месца у Вялікай Брытаніі. Асабліва алігархам з грашыма сумнеўнага паходжання. Да прыкладу, у брытанцаў няма сумневаў, што [расейскі бізнэсовец Раман] Абрамовіч цесна звязаны з Крамлём. Думаю, паводле фінансавых плыняў яны бачаць, што праз ягоныя структуры адмываецца капітал. Я ўпэўнены, што за лабізм і прапаганду Крамля ў Брытаніі часткова адказвае Абрамовіч", - адзначыў Баравы.

З ягоных слоў, Масква марнуе вялікія грошы на сваіх лабістаў у Еўропе і ЗША.

"Цяпер намаганні Крамля сканцэнтраваныя на прыпыненні альбо хоць бы зніжэнні санкцыйнага ціску. Гэтыя абмежаванні вельмі адчувальныя для расейскай эканомікі. Усе сілы кінутыя на тое, каб нешта з гэтым зрабіць. Антысанкцыі РФ - спосаб перавесці стрэлкі, каб не гаварыць пра Крым і ваенныя дзеянні на Данбасе. Бо менавіта праз гэта санкцыі і былі ўведзеныя. Масква выдаткоўвае мільярды даляраў на лабісцкую дзейнасць у Еўропе і ЗША. Улады РФ хочуць пераканаць заходнюю супольнасць, што ёй невыгодныя абмежаванні. Прыпыненне санкцый стане для Крамля стымулам прадаўжаць агрэсію супраць Украіны. Пакрысе на Захадзе гэта разумеюць", - падкрэсліў суразмоўца.

Ён мяркуе, што рэалізацыя Расеяй праекта "Паўночны струмень - 2", напрыклад, накіраваная на "подкуп" еўрапейскага бізнэсу.

"Лабісты Расеі ў Еўропе займаюцца подкупам палітыкаў, журналістаў, прадпрымальнікаў. Апошніх завабліваюць новымі праектамі. Той жа" Паўночны струмень - 2" - гэта праверка гатоўнасці Еўразвязу супрацьстаяць агрэсіўнасці РФ. І пакуль ЕЗ гэты тэст не вытрымлівае. Відаць, што карупцыйны ціск перасягае здаровы сэнс і клопат пра ўласную бяспеку", - рэзюмаваў Баравой.

Камітэт у міжнародных справах парламента Вялікай Брытаніі рэкамендаваў парламентарыям узмацніць санкцыі ў дачыненні да атачэння расейскага прэзідэнта Уладзіміра Пуціна, у тым ліку са "спісу Магніцкага". Пра гэта гаворыцца ў дакладзе пад назвай "Маскоўскае золата: расейская карупцыя ў Вялікай Брытаніі", апублікаваным на сайце парламента.

Кіраўнік камітэта Том Тугендхат падчас прадстаўлення дакладу адзначыў, што ва ўладаў Брытаніі больш няма ніякіх апраўданняў, каб і ў далейшым "закрываць вочы", бо "клептакраты прэзідэнта РФ і парушальнікі правоў чалавека выкарыстоўваюць грошы, адмытыя праз Лондан, каб падкупіць "сяброў Брытаніі і падарваць веру ў інстытуты ўлады ў Злучаным Каралеўстве.

1 траўня дэпутаты Палаты абшчын брытанскага парламента абавязалі заморскія тэрыторыі Вялікай Брытаніі, у тым ліку Брытанскія Віргінскія выспы і Кайманавы выспы, раскрываць імёны ўладальнікаў афшорных рахункаў.

Паводле звестак газеты The Times, прыняцце гэтага закона прывядзе да раскрыцця імёнаў расейскіх бізнэсоўцаў, якія хаваюць актывы ў брытанскіх афшора. Каментуючы гэтую інфармацыю, у Крамлі заявілі, што Брытанія займае "двухаблічную пазіцыю ў плане міжнароднага процідзеяння адмыванню нелегальных прыбыткаў".

Няўрадавая арганізацыя Global Witness падлічыла, што грамадзяне РФ захоўваюць на рахунках у брытанскіх афшораў $47 млрд.