Пекін запатрабаваў ад «Раснафты» спыніць працы на шэльфе ў Паўднёва-Кітайскім моры

• 17.05.2018, 14:47

Кітай уважае здабычу нафты ў гэтай галіне парушэннем свайго суверэнітэту.

МЗС КНР выступіла супраць распрацоўкі радовішча «Чырвоная архідэя», на тэрыторыі якога пачала ў аўторак працаваць Rosneft Vietnam - даччыная кампанія «Раснафты».

Афіцыйны прадстаўнік МЗС КНР Лу Кан заявіў, што ніводная кампанія не мае права займацца распрацоўкай рэсурсаў у акваторыі, кантраляванай КНР.

Як паведамляе rbc.ru, так Лу Кан пракаментаваў пачатак работ кампаніі Rosneft Vietnam на радовішчы ў Паўднёва-Кітайскім моры.

«Мы патрабуем праяўляць павагу да суверэнітэту нашай дзяржавы», - заявіў Лу Кан.

Афіцыйны прадстаўнік кітайскага замежнапалітычнага міністэрства заявіў, што такія пытанні могуць негатыўна адбіцца на стасунках Пекіна з дзяржавамі, якія парушаюць суверэнітэт краіны.

Раней агенцтва Reuters паведаміла аб тым, што ў Rosneft Vietnam баяліся негатыўнай рэакцыі Пекіна на распрацоўку радовішча ў Паўднёва-Кітайскім моры. На думку в'етнамскіх уладаў, радовішча «Чырвоная архідэя» знаходзіцца ў выключнай эканамічнай зоне В'етнама, аднак улады КНР адносяць яго да зоны ўнутры так званай «дзевяціпункцірнай лініі», якой на кітайскіх мапах абведзеная акваторыя Паўднёва-Кітайскага мора, якую ў Пекіне ўважаюць за сваю.

Rosneft Vietnam, як паведамляе Reuters, разлічвала не прыцягваць увагу да сваёй працы. Пры гэтым «Раснафта» на сваім сайце апублікавала паведамленне аб пачатку свідравання.

У самой «Раснафце» ў каментары паведамлення Reuters заявілі РБК, што ліцэнзійныя дзялянкі на шэльфе Паўднёва-Кітайскага мора, на якіх вядуцца работы, знаходзяцца ў тэрытарыяльных водах В'етнама. «Кампанія вядзе сваю дзейнасць у строгай адпаведнасці з ліцэнзійнымі абавязацельствамі і выкананнем заканадаўства ў недравыкарыстанні рэспублікі В'етнам», - гаворыцца ў каментары.

Пазней прэс-сакратар прэзідэнта Расеі Дзмітрый Пяскоў заявіў, што, «наколькі нам вядома, кампанія зрабіла заяву, што працуе ў адпаведнасці з атрыманымі ліцэнзіямі».