Ігар Жданаў: Крымскі мост доўга не прастаіць і паваліцца праз прыродныя ўмовы

• 15.05.2018, 18:55

РФ пасля вяртання акупаванага Крыма давядзецца заплаціць за шкоду, нанесеную будаўніцтвам Крымскага моста.

Міністр спорту і моладзі Украіны Ігар Жданаў адмовіўся каментаваць расейскім СМІ ўвядзенне ў эксплуатацыю Крымскага моста. Пра гэта ён напісаў у Facebook, паведамляе gordonua.com.

«З прэсай і тэлебачаннем краіны-акупанта і агрэсара прынцыпова не маю зносіны. Прашу не турбаваць. Больш за тое, упэўнены, што гэты так званы мост доўга не прастаіць і абрынецца праз прыродныя ўмовы, якія не дазваляюць будаваць такога роду аб'екты ў той лакацыі», - падкрэсліў міністр.

Жданаў дадаў, што Расеі пасля вяртання акупаванага Крыма давядзецца выплаціць Украіне буйную кампенсацыю.

«Ёй давядзецца спаўна расплаціцца за каласальную шкоду, якую гэтае незаконнае і варварскае будаўніцтва нанесла экалогіі Чорнага і Азоўскага мораў. Гаворка ідзе як мінімум пра дзясяткі мільярдаў грыўняў», - адзначыў ён.

Расея анэксавала Крым і Севастопаль пасля незаконнага рэферэндуму 16 сакавіка 2014 года. Далучэнне паўвострава да РФ не прызнаецца Украінай і большасцю краін свету.

Транспартны пераход праз Керчанскі праліў будуецца за кошт сродкаў федэральнага бюджэту Расеі. Агульны кошт праекта складае блізу 228 рублёў (блізу $4 млрд). У міністэрстве транспарту РФ заяўлялі, што забяспечаць адкрыццё аўтамабільнага руху па Керчанскім мосце да снежня 2018 года, а рух цягнікоў - да 2019-га.

У сакавіку 2018 года ведамства ўдакладніла, што ўжо ў траўні праезд будзе адкрыты для легкавога транспарту і пасажырскіх аўтобусаў.

15 траўня прэзідэнт РФ Уладзімір Пуцін адкрыў Крымскі мост. Прэзідэнт Украіны Пятро Парашэнка заявіў, што мост абавязкова спатрэбіцца акупантам, калі яны будуць тэрмінова пакідаць украінскі Крым.