Прынцу Бэльгіі скарацілі «заробак»

• 2.04.2018, 12:06

Выплаты зменшылі за несанкцыянаваную дыпламатычную дзейнасць.

Парламент Бэльгіі прыняў пастанову скараціць выдаткі на ўтрыманне прынца Ларана праз ягоную несанкцыянаваную дыпламатычную дзейнасць.

Пра гэта паведамляе ВВС.

Прынц Ларан у мінулым годзе ў параднай форме марскога афіцэра наведаў амбасаду Кітая ў Брусэлі, каб адзначыць 90-годдзе Кітайскага народнага войска.

Прэм'ер-міністр Бэльгіі Шарль Мішэль папярэджваў прынца аб неабходнасці атрымліваць дазвол МЗС перад вядзенне якой-небудзь дыпламатычнай дзейнасці.

Мішэль прапанаваў скараціць штогадовае фінансаванне дзейнасці прынца на 15%, і дэпутаты падтрымалі гэтую пастанову. Да скарачэння бэльгійскі бюджэт выдаваў прынцу 307 тысяч еўраў, цяпер ён будзе атрымліваць на 46 тысяч еўраў менш.

54-гадовы прынц Ларан з'яўляецца малодшым братам караля Піліпэ. Перад галасаваннем ён даслаў эмацыйны ліст дэпутатам, у якім нагадаў, што ён, як сямейнік каралеўскай сям'і, не можа зарабляць на жыццё.

Ён назваў галасаванне "судом над маім жыццём". "Гэтыя выплаты, скарачэнне якіх абмяркоўваецца ў выніку палітычных ці медыйных плыняў - гэта кошт на жыццё, кошт майго жыцця", - напісаў ён.

Адвакат прынца раней заявіў, што ўрад не можа скарачаць выплаты, бо ў Ларана няма доступу да сацыяльнага забеспячэння або пенсіі, а таксама ён не мае права ўладкавацца на працу, якая аплачваецца.

Гэта ўжо не першы выпадак, калі прынц праводзіць несанкцыянаваную дыпламатычную дзейнасць.

У кастрычніку 2016 гады ён сустрэўся з прэм'ер-міністрам Шры-Ланкі Ранілам Вікрамасінгхам, калі той наведаў Брусэль. Прынц ездзіў у Дэмакратычную Рэспубліку Конга ў 2011 годзе і сустрэўся з прэзідэнтам Жозэфам Кабілам, здзейсніў некалькі візітаў у Лібію, калі Муамар Кадафі знаходзіўся пры ўладзе.