Жыхары Падмаскоўя выйшлі на акцыю пратэсту

• 24.03.2018, 15:36

У Валакаламску праходзяць акцыі супраць смеццевага палігону.

Блізу тысячы жыхароў Валакаламску выйшлі на мітынг да будынка адміністрацыі з патрабаваннем зачыніць смеццевы палігон, паведамляе карэспандэнт «Настоящего Времени» з месца падзей. Пратэстоўцы таксама павязалі на вопратку ружовыя стужкі - у падтрымку школьніцы Тані, якая стала вядомай у інтэрнэце пасля іншага стыхійнага мітынгу 21 сакавіка, паведамляе сайт "Настоящее время".

Мэр Валакаламску Пётр Лазараў паабяцаў ліквідаваць палігон. Пасля перамоў з адміністрацыяй горада мясцовы актывіст, які браў удзел у нарадзе, Арцём Любімаў распавёў, што пакуль палігон «Ядрава» не закрыюць, але звазіць будуць толькі мясцовае смецце.

Другая акцыя жыхароў запланаваная на 15.00 маскоўскага часу на самім палігоне «Ядравы». Як паведамляе карэспандэнт «Настоящего времени», на яе прыйшлі толькі некалькі сотняў гараджан.

«Настоящее время» будзе сачыць за пратэстамі жыхароў цягам усяго дня. А 15.00 паводле маскоўскага часу глядзіце жывое ўключэнне з галоўнай акцыі ў Валакаламску.

Напярэдадні 21 сакавіка ў цэнтральны раённы шпіталь Валакаламску звярнуліся 50 дзяцей з розных школ горада са скаргамі на млоснасць і галаўныя болі. У горадзе адчуваўся моцны пах серавадароду. У прэс-службе мясцовай адміністрацыі пацвердзілі, што ўночы 21 сакавіка адбыўся чарговы залпавы выкід газу з палігона «Ядравы».

23 сакавіка кіраўніка Валакаламскага раёна Маскоўскай вобласці Яўгена Гаўрылава адправіў у адстаўку губернатар вобласці Андрэй Вараб'ёў.

Праз некалькі гадзін у шпіталь Валакаламску, куды даставілі дзяцей, сабралася больш за сотню чалавек - яны сустрэлі губернатара Маскоўскай вобласці Андрэя Вараб'ёва з крыкамі «Ганьба», «У адстаўку», «Забойцы». Вараб'ёву ўдалося выйсці з кола людзей толькі праз 10-15 хвілін. Да шпіталю прыехалі супрацоўнікі АМАПу.