Відэафакт: На гарналыжным курорце ў Сочы са снегам выпаў пясок

• 23.03.2018, 21:34

Як мяркуецца, пясок прынесла ветрам з Паўночнай Афрыкі.

23 сакавіка карыстальнікі сацсетак апублікавалі фатаграфіі і відэа з гарналыжнага курорта «Роза Хутор» у Сочы, на якім снег пакрыты пластом жоўтага пяску, паведамляе «Медуза».

Даведачная служба курорта пацвердзіла ТАСС, што снег памяняў колер. Са слоў прадстаўнікоў «Роза Хутор», гэта не перашкаджае лыжнікам і сноўбардыстам катацца. Адпачывальнікі гавораць, што мясцовыя пейзажы падобныя на кадры з фільмаў пра апакаліпсіс ці Марс.

Пясок выпаў разам з ападкамі. Як мяркуецца, яго прынесла ветрам з Паўночнай Афрыкі.

Раніцай 23 сакавіка пясчаная бура пачалася і на грэцкай выспе Крыт. У адрозненне ад Сочы, дзе пясок не перашкаджае адпачывальнікам, на Крыце пясчаная бура і высокая тэмпература паветра неспрыяльна адбіваюцца на самаадчуванні жыхароў. Паводле інфармацыі грэцкага выдання Кathimerini, 17 чалавек звярнуліся ў бальніцы.